Ola chicos e chicas de 1º.


No blog "PEQUENOS CIENTÍFICOS" atoparedes eses vídeos tan divertidos que sei que vos gustan moito, teredes xogos, poderei poñer as vosas fotografías, os traballos que facemos na clase, os que facedes na casa e moitísimas cousas máis.



DESEXO QUE ESTE BLOG SEXA UN ESPAZO DE APRENDIZAXE E DIVERSIÓN PARA TODOS!


domingo, 25 de outubro de 2020

INVESTIGAMOS SOBRE A GAIVOTA PATIAMARELA

Seguimos traballando no proxecto do centro deste curso, "12 Marabillas de Galicia", e agora tócanos aprender moitas cousas sobre unha das aves que vive en varias illas do Parque Nacional Marítimo Terrestre das Illas Atlánticas.

Despois de resolver o último enigma que xurdiu na clase de ciencias atopámonos cunha nova amiga, que estaba agochada no enorme acibro que temos no colexio, a GAIVOTA PATIAMARELA. 



Nos seguintes vídeos temos moita información sobre esta ave.





SEGUE O MISTERIO!

Este curso están ocorrendo cousas moi estrañas na clase de Ciencias.

Esta semana apareceron pinchadas na corcheira diferentes cousas que non sabiamos para que servían: 

- unha foto dunha gaivota patiamarela no mesmo lugar no que Antía e Fiz, os nosos novos amigos, atoparon o cofre antigo.

- un papel pechado que poñía Instrucións. 

- 6 sobres numerados.


O primeiro que decidimos facer foi ler as instrucións.

Wasim foi voluntario para lelas e xa entendimos un pouco máis do que sucedía.


Merce daríanos unhas fichas que deberiamos facer para poder abrir cada sobre, pero había unha condición moi importante, non poderiamos abrir o sobre ata que todos os nenos remataramos as fichas. Había que darse presa para facelas!
Tiñamos que facer 5 fichas para poder abrir os cinco primeiros sobres e cando estiveran todas poderiamos abrir o sobre nº 6.


Así o fixemos. As fichas non eran nada difíciles xa que preguntaban cousas que xa viramos sobre o Parque Nacional Marítimo Terrestre das Illas Atlánticas.
Dentro de cada sobre había unha letra coa que deberiamos formar unha palabra que nos daría unha importante pista para atopar... non sabiamos que?

 


Coas diferentes letras atopadas dentro dos sobres conseguimos a palabra ÁRBORE. Había que buscar algo nunha árbore do cole. 


Saimos rapidamente ao patio e alí, no acibro que hai diante da ventá da sala de profes, estaba a Gaivota patiamarela. Collímola e levámola para clase.




Non sabiamos que quería dicir aquilo, pero como tocou o timbre tivemos que deixalo para o próximo día de clase. 

QUE SIGNIFICARÍA?

domingo, 18 de outubro de 2020

UN VERDADEIRO MISTERIO!

O venres pasado, durante a clase de Ciencias, Carmen trouxo diferentes cousas que acababan de chegar ao colexio para ser entregadas urxentemente aos alumnos de 2º curso de primaria.

Había un sobre cunha carta escrita por dous amigos chamados Antia e Fiz. Gonzalo leu a carta e todos escoitamos atentamente.


Ola nenas e nenos de 2º curso do colexio Cruceiro de Vilalonga.

Somos Antía e Fiz, dous amigos que esta fin de semana pasada fomos pasar o domingo ás Illas Cíes.

Cando camiñabamos entre as rochas descubrimos, agochado nun buraco, un pequeno cofre antigo.

Con moito coidado baixámolo ata a praia de Rodas e decidimos abrilo. Non nos costou moito traballo porque a pechadura estaba moi vella.

Dentro había un pergamiño, unha bandeira pirata e outra bandeira dun país que non sabemos cal é.

Abrimos o pergamiño para lelo e só había unha mensaxe moi inquietante: “NECESITAMOS A VOSA AXUDA!!!”.

Non entendemos esa mensaxe e non sabemos que facer coas bandeiras.

 Podedes axudarnos, por favor?

 

Unha aperta de Antía e de Fiz.


Outra cousa que había era un papiro atado cunha corda. Sara abríuno e ensinóunos o que alí poñía. Era unha mensaxe moi preocupante!




O terceiro obxecto era unha carpeta vermella e dentro estaban as fotografías de Antía e Fiz, os dous amigos que nos pedían colaboración. Jacobo e Benjamín móstrannos aos dous rapaces.


Por último, había dúas fotografías de Antía e Fiz nas Illas Cíes. Nelas vemos como os dous amigos atopan un cofre antigo, dentro do cal hai un papiro, unha bandeira pirata e unha bandeira dun país que temos que investigar cal é.





Qué misterioso é todo! 

Con todos estes ingredientes estamos diante dun verdadeiro enigma!

Tentaremos axudar a Antía e a Fiz a resolver o misterio!


venres, 9 de outubro de 2020

PARQUE NACIONAL DAS ILLAS ATLÁNTICAS


Durante este curso, e dentro do proyecto "12 MARABILLAS DE GALICIA", o alumnado de 2º curso de primaria investigará o "PARQUE NACIONAL MARÍTIMO TERRESTRE DAS ILLAS ATLÁNTICAS".

Na clase vimos diferentes fotografías e os nenos mostráronse entusiasmados coas paisaxes polo que teñen moitísimas ganas de empezar a sua investigación.

Daremos un pequeno paseo polas diferentes illas a través destes vídeos.

Parque Nacional das Illas Atlánticas


  Illas Cíes  





  Illa de Ons  







  Illa de Sálvora  



  Illa de Cortegada  





  FANTÁSTICOS VÍDEOS!